භෞතික සංවර්ධන සැලසුම්කරණය තුළින් තිරසර සංවර්ධන අරමුණු වල ප්‍රගතිය වේගවත් කිරීමට අදාළ සාකච්ඡාව

තිරසර සංවර්ධන අරමුණු ළඟාකර ගැනීමේ ප්‍රගතිය වේගවත් කිරීම සඳහා භෞතික සංවර්ධන සැලසුම්කරණය ඉතා වැදගත් කාර්යභාරයක් ඉටු කරනු ලබයි. ජාතික භෞතික සැලැස්ම හා සමපාත වූ ජාතික ආර්ථික සැලසුම් ක්‍රියාවට නැංවීම ඒ සඳහා අත්‍යවශ්‍ය වේ. ජාතික භෞතික සැලසුම් දෙපාර්තමේන්තුව (NPPD) ජාතික භෞතික ප්‍රතිපත්ති, සැලසුම් සහ උපාය මාර්ග සකස් කිරීමේ වගකීම දරන ආයතනය වේ. එහි ප්‍රධාන වගකීම් අතරට ජාතික භෞතික සැලැස්ම, ජාතික ප්‍රතිපත්තියට අනුකූලව කලාපීය සහ ප්‍රාදේශීය සැලසුම් සකස් කිරීම සහතික කිරීම, ඉඩම් සංවර්ධනය ප්‍රවර්ධනය කිරීම සහ නියාමනය කිරීම සහ ස්වාභාවික හා ගොඩනඟන ලද පරිසරය සංරක්ෂණය කරමින් නිසි යටිතල පහසුකම් සුරක්ෂිත කිරීම ඇතුළත් වේ.

ඒ අනුව යමින්, තිරසර සංවර්ධන සභාවේ ඉල්ලීම පරිදි, නාගරික සංවර්ධන, ඉදිකිරිම් සහ නිවාස අමාත්‍යංශ ලේකම්, රංජිත් ආරියරත්න මහතාගේ ප්‍රධානත්වයෙන් මේ පිළිබඳ සාකච්ඡාවක් පසුගිය සඳුදා දින එම අමාත්‍යංශ ශ්‍රවණාගාරයේදී පැවැත්විණි.

මෙම සාකච්ඡාවේ ප්‍රතිඵලයක් ලෙස නාගරික සංවර්ධන, ඉදිකිරිම් සහ නිවාස අමාත්‍යංශය යටතේ පවතින සියලුම ආයතන වල ඉහළ පෙළේ නිලධාරීන්ගෙන් සමන්විත මෙහෙයුම් කමිටුවක් පත් කර එම අමාත්‍යාංශයට අදාළ තිරසර සංවර්ධන අරමුණු වන තිරසර නගර හා ජනාවාස (SDG 11) සහ ජලය සහ සනීපාරක්ෂාව(SDG 06) වලට අදාළ ඉලක්ක ළඟාකර ගැනීම සඳහා වැඩසටහනක් සකස් කිරීමට එකඟතාව ඇති කරගන්නා ලදී.

මෙම සාකච්ඡාව සඳහා නාගරික සංවර්ධන, ඉදිකිරිම් සහ නිවාස අමාත්‍යංශයේ අතිරේක ලේකම් (නිවාස), අධ්‍යක්‍ෂ ජනරාල්, ජාතික භෞතික සැලසුම් දෙපාර්තමේන්තුව, අධ්‍යක්‍ෂ ජනරාල්, ඉදිකිරීම් කර්මාන්ත සංවර්ධන අධිකාරිය ඇතුළු නිලධාරීන් සහ තිරසර සංවර්ධන කවුන්සිලයේ සාමාජික වාස්තු විද්‍යාඥ සිතුමිණ රත්නමලල මහතා සහභාගී වූ අතර තිරසර සංවර්ධන සභාවේ අධ්‍යක්‍ෂ ජනරාල් චමින්ද්‍රි සපරමාදු මහත්මිය විසින් අදාළ ඉදිරිපත් කිරීම් සිදු කරන ලදී.